3
Oct

AIDS နဲ့ အမျိုးသမီးများ

AIDS နဲ့ အမျိုးသမီးများ အကြောင်းကို အထက်မှာလည်း တော်တော်များများ ရေးခဲပြီးပါပြီ။ ဒါ့ပြင် ဒီနေ့ ဒီကမ္ဘာရဲ့ လူ့လောကမှာ အမျိုးသမီးတွေဟာ တစ်ပန်းရှုံးနေတဲ့ ကိစ္စတွေ အများကြီး ရှိတယ်။ ကမ္ဘာပေါ်ရှိ အရပ်ဒေသအလိုက် အမျိုးသမီးတွေဟာ တန်းတူအခွင့်အရေး မခံစားရတာတွေ ရှိတယ်။ ဥပမာ အမျိုးသမီးတွေဟာ ပညာရေးမှာ နိမ့်ကျကြတယ်။ ကျောင်းနေခွင့် ပညာသင်ကြားရေးမှာ မိန်းကလေးတွေဟာ ယောက်ျားကလေးတွေလောက် မခံစားရဘူး။ အလားတူပဲ ငွေကြေး ဝင်ငွေအင်အားလည်း မရှိကြဘူး။

တချို့နေရာတွေမှာဆိုရင် ဥပဒေထုံးတမ်းအရ အမျိုးသမီးဟာ မြေအိမ်ရာပိုင်ဆိုင်ခွင့်၊ အမွေဆိုင်ခွင့်တွေမှာတောင် ခွဲခြားခြင်း နှိမ်ခြင်း ခံရတယ်။ ဒီပြင်လည်း အိမ်မှာဆိုရင် ယောက်ျား သြဇာအာဏာ လွှမ်းမိုးမှု များလှတဲ့အတွက် မလွန်ဆန်နိုင်လောက်အောင် အခြေအနေမျိုး အချို့တိုင်းပြည်တွေမှာ ရှိတယ်။ ဒီတော့ AIDS ရောဂါ ပြန့်ပွားမှု ကိစ္စမှာ ဘယ်လို ဖြစ်တယ်ဆိုတာကို ကိုယ်ကနေ သိပြီးဖြစ်တောင် ယောက်ျားရဲ့ ဆန္ဒနဲ့ အာဏာကို မလွန်ဆန်ဝံ့လို့ ငြိမ်ပြီး ငုံပြီး ခံလိုက်ရလို့ ရောဂါကူးခြင်း ခံရနိုင်တယ်။

မိန်းမတစ်ယောက်က ဘယ်လို သစ္စာစောင့်သိပေမယ့် ယောက်ျားတွေက အပြင်မှာလော်လည်ခဲ့လို့ ရောဂါရလာရင်လည်း မိန်းမမှာ ခံရနိုင်တယ်။ လိင်ကွဲများ ဆက်ဆံမှု (ယောက်ျား/မိန်းမ) ကြောင့် AIDS ရောဂါ ပြန့်ပွားတဲ့ နိုင်ငံတစ်ချို့မှာ လေ့လာကြည့်လို့ တွေ့ရတာကတော့ ဒီရောဂါဟာ ယောက်ျားတွေဆီက ရတာများတယ်။ ယောက်ျားတွေဟာ အိမ်ထောင်မပြုခင်ကလည်းကောင်း ပြုပြီးမှလည်းကောင်း အိမ်ထောင်ရဲ့အပြင်က အမျိုးသမီး တစ်ဦးတစ်ယောက်နဲ့ ဆက်ဆံလို့ ရတာဖြစ်တယ်။

အချို့ခရီးထွက်သူ ယောက်ျားများမှာ ဒီလို အန္တရာယ်ဟာ ပိုလို့ ရှိတယ်။ ဒီတော့ မိန်းမတစ်ဦး AIDS ရတာဟာ သူတို့ကိုယ်တိုင် ပြုမှုချက်၊ ဥပမာ ပြည့်တန်ဆာလုပ်ခြင်း၊ မူးယစ်ဆေးထိုးခြင်းမှ အပ၊ ကိုယ်က အန္တရာယ်ရှိဖွယ် ကိစ္စ ဘာမှ မလုပ်ဘဲလဲ ရနိုင်တယ်။ နောက်တစ်ချက်ကတော့ မုဒိမ်းကျင့်ခြင်း ခံရသူများဟာလည်း ပြုကျင့်ကြသူများမှာ AIDS ရှိလျှင်လည်း ရနိုင်တယ်ဆိုတာ သိထားဖို့ လိုပါတယ်။ ရောဂါဖြစ်တာမှအပ မိန်းမတွေ AIDS ရောဂါဖြစ်မှု ပတ်သက်နေတဲ့ အရေးကြီးတဲ့ အပိုင်းကဏ္ဍတစ်ခု ရှိသေးတယ်။

ဒါကတော့ မိန်းမတွေ ကျန်းမာရေး ပြုစုစောင့်ရှောက်မှု ပေးရမယ့် အပိုင်းပဲ။ အိမ်မှာ တစ်ဦးတစ်ယောက် နေမကောင်းဘူးဆိုရင် ဒီလူနာပြုစုဖို့ရာအတွက် အဓိက တာဝန်ကို မိန်းမတွေက ယူရတာချည်းပါပဲ။ AIDS ရောဂါသည်တွေ များလာတာနဲ့အမျှ ဒီတာဝန်ကြီးဟာ ဘယ်လောက်ကြီးမားလာလိုက်မလဲ။ နောက်ပီး ဒီရောဂါလည်း နာတာရှည်ဆိုတော့ ပိုလို့ ဝန်လေးစရာအကြောင်း ရှိတာပေါ့။ အကယ်၍ အမျိုးသမီး ကိုယ်တိုင်ကလည်း ဒီရောဂါ ဖြစ်နေ၊ ကလေးကလည်း ဖြစ်နေဆိုရင်တော့ ပြောစရာမရှိတော့ဘူး။

ဒါပြင် ယောက်ျားလည်း ဖြစ်နိုင်သေးတယ်။ ဒါတွေဟာ စိတ်ကူးယဉ် အကျယ်ချဲ့ ပြောနေတာ မဟုတ်ဘူး။ ကမ္ဘာတချို့အပိုင်းမှာ ဥပမာ အာဖရိကဆိုရင် ဒီလို အခြေမျိုးကို အခုလတ်လတ်လောလော ရင်ဆိုနေရပြီ။ ယူဂန်ဒါပြည် တောပိုင်းရှိ ရွာကလေး တစ်ခုမှာ အသက် ၄၅ နှစ်ရှိ အမျိုးသား တစ်ဦးဟာ AIDS ရောဂါကြောင့် အိပ်ရာထဲက မထနိုင်တော့ပဲ သေလုဆဲဆဲ ဖြစ်နေပြီ၊ သူ့ကို အသက် ၃၀ အရွယ်ရှိ သူ့ဇနီးက စောင့်ရှောက် ပြုစုနေရတယ်။

ဒီမိန်းမကိုယ်တိုင်ကလည်း AIDS ဖြစ်နေပြီ ရောဂါအခြေအနေအရ အိပ်ရာထဲ မလဲသေးလို့သာ။ မိန်းမတို့ဘဝဆိုတာကတော့ ဗုံးဗုံးမလဲအချင်း ရုန်းကန်ပြီး တာဝန်ထမ်းနေရမှာပဲ။ ဒီလိုသာ တာဝန်သိသိနဲ့ အနှစ်နာခံရတယ် ဘယ်သူကမှလည်း အသိအမှတ်ပြုခြင်းတော့ မခံရပါဘူး။ “ဒါ မိန်းမအလုပ်ပဲ” လို့သာ ဆိုပြီး စာနာစိတ်မထားပဲ အမှတ်မဲ့ ပုံမှန် ကိစ္စလို မှတ်ယူထားနေကြတာပဲ။

ဒေါက်တာ ဒေါ်မြင့်မြင့်ခင် ရေးသားသော “လူတိုင်းအတွက် ထိုးတဲ့ ခေါင်းလောင်း” စာအုပ်မှ ပြန်လည်ရေးသား ဖော်ပြထားခြင်း ဖြစ်ပါသည်။

Leave a Reply

Your email address will not be published. Required fields are marked *

Captcha *

Follow me on:

Back to Top