မြန်မာနိုင်ငံမှာ အဖြစ်များနေတဲ့ ရောဂါသုံးမျိုးကို တိုက်ဖျက်ဖို့အတွက် လာမယ့်ဘဏ္ဍာရေးနှစ်အတွင်း အမေရိကန်ဒေါ်လာ ၇၇ သန်း အပိုဆောင်းပေးမယ်လို့ ဂလိုဘယ်ဖန်းက ပြောပါတယ်။
အခုလို ရန်ပုံငွေ တိုးပေးမှာကြောင့် အိတ်ခ်ျအိုင်ဗီ၊ အေအိုင်ဒီအက်စ် ဝေဒနာသည်တွေ ရာခိုင်နှုန်းပြည့်နီးပါး အေအာတီဆေး ရတော့မယ်လို့ ဂလိုဘယ်ဖန်းရဲ့ မြန်မာနိုင်ငံ အဆင့် လုပ်ငန်းညှိနှိုင်းရေး အရာရှိ ဒေါ်နွယ်ဇင်ဝင်း က ပြောပါတယ်။
အေအာတီဆေးဆိုတာက ဝေဒနာရှင်တွေ ရောဂါဆက်မတိုးအောင် ထိန်းထားတဲ့ သောက်ဆေး ဖြစ်ပါတယ်။ ၇၇ သန်း တိုးပေးမယ်၊ လိုအပ်လာရင် ၈၅ သန်း အထိ တိုးပေးသွားမယ်လို့လည်း ဒေါ်နွယ်ဇင်ဝင်းက ပြောပါတယ်။
ဂလိုဘယ်ဖန်းဟာ ၂၀၀၆ က မြန်မာနိုင်ငံကနေ ပြန်ထွက်သွားခဲ့ပြီး၊ ၂၀၀၉၊ ၂၀၁၀ မှာ ပထမအဆင့် အကူအညီတွေ ပြန်ပေးခဲ့ပါတယ်။ ၂၀၁၄ ဂလိုဘယ်ဖန်း အကူအညီသစ်တွေ မပေးခင်မှာ အခုလို ရန်ပုံငွေတွေ တိုးပေးတာလို့လည်း သိရပါတယ်။
အခုလက်ခံရရှိမယ့် ရန်ပုံငွေကို လာမယ့်ဇွန်လမှာ မြန်မာကျန်းမာရေးဝန်ကြီးက လက်မှတ်ထိုးပြီး လက်ခံယူမယ်လို့ သိရပါတယ်။ မြန်မာနိုင်ငံမှာ လူတစ်သန်းကျော်ဟာ တီဘီရောဂါကို ခံစားနေရပြီး၊ နိုင်ငံ့လူဦးရေရဲ့ ရှစ်ရာခိုင်နှုန်းဟာ ငှက်ဖျားရောဂါ ကူးစက်ခံနေရပါတယ်။
အစိုးရရဲ့ တရားဝင်စာရင်းဇယားတွေအရတော့ မြန်မာနိုင်ငံမှာ လူ တစ်သောင်းရှစ်ထောင်ဟာ အိတ်ခ်ျအိုင်ဗီ၊ အေအိုင်ဒီအက်စ်နဲ့ သေဆုံးခဲ့တယ်လို့ သိရပါတယ်။
