သျှမ်းပြည်မြောက်ပိုင်း၊
နမ့်ခမ်းမြို့တွင် မူးယစ်ရဲ အပါအဝင် နအဖအရာရှိများ လာဘ်စားမှုကြာင့် မူးယစ်ဆေးဝါး လက်လီလက်ကား
ရောင်းဝယ်သူများအား အရေးယူခြင်း မရှိဘဲ မူးယစ်ဆေးဝါးများ လှိုင်လှိုင်ဖြန့်ဖြူးလျက် ရှိကြောင်း
နယ်စပ်သတင်းများ အရ သိရှိရသည်။

“လာဘ်ထိုး နိုင်လို့ပေါ့။ မူးယစ်ဆေးဝါး ရောင်းဝယ်သုံးစွဲမှန်း
သိပေမဲ့ မူးယစ်ရဲ အပါအဝင် ဆိုင်ရာနအဖ အာဏာပိုင်တွေ ကိုယ်တိုင် ပါဝင်ပတ်သက်နေလို့
အရေးမယူနိုင်တာ”
ဟု နမ့်ခမ်းမြို့ခံ တစ်ဦးက သျှမ်းသံတော်ဆင့်သို့ ပြောပါသည်။

နမ့်ခမ်းမြို့တွင်
ဘိန်းဖြူပေါများပြီး အလွယ်တကူ ဝယ်ယူနိုင်သောကြောင့် ဆယ်ကျော်သက် ကျောင်းသူ/သား များပါ
မူးယစ်ဆေးဝါး သုံးစွဲလာကြောင်းကို ဤကဲ့သို့ ဆက်လက် ပြောပြပါသည်။

“ကျောင်းနေအရွယ် အသက် ၁၄ နှစ်အထက်
ကျောင်းသားတွေလဲ ပညာရေးဘက် စိတ်မဝင်စားဘူး။ မူးယစ်ဆေး သုံးစွဲလာတတ်ကြလို့
သူတို့ပညာရေး အရမ်းထိခိုက်တယ်။ တချို့ မိန်းကလေး တွေရောဘဲ အဲဒီကိစ္စ လုပ်လာတယ်”

နမ့်ခမ်းမြို့နယ် ဟိုနမ့် (ရေပေးဝေရေးအရပ်)
ဘက်တွင် ဘိန်းဖြူကို အလွယ်တကူ ဝယ်ယူနိုင်ကြောင်း၊ သုံးစွဲသူများက ရာမထက် ဘိန်းဖြူကို
ပိုမို နှစ်သက် အသုံးများကြောင်း သိရှိရသည်။

ထို့နည်းတူ နမ့်ခမ်းမြို့
မိုခမ်းရပ်ကွက်သစ် ဇေယျသုခ ဘုန်းကြီးကျောင်းအနီး ဖွင့်လှစ်ထားသော နန်းသူဇာ
အနှိပ်ခန်းတွင်လည်း ရာမ၊ ဘိန်းဖြူ၊ ခါခူးစသည့် မူးယစ်ဆေးဝါးများ လွယ်ကူစွာ ဝယ်ယူ နိုင်သည်ဟု
ဆို၏။

အနှိပ်ခန်းပိုင်ရှင် စိုင်းစံဖိုး
အသက် (၅၅) နှစ်သည် နမ့်ခမ်း၊ မူစယ်မှ လားရှိုးအထိ နအဖ အငယ်တန်း အရာရှိအစ အထက်တန်း
အရာရှိအထိ သိကျွမ်းဝင် ဆန့်သူဖြစ်ကြောင်း၊ ဒေသခံအာဏာပိုင်များ မကြာခဏ လာနှိပ်လေ့ရှိပြီး
တချို့ မူးယစ်ရဲများ ပင်လျှင် မူးယစ်ဆေး လာသုံးစွဲကြောင်း၊ ထို့ကြောင့်
စိုင်းစံဖိုးပိုင် အနှိပ်ခန်းက တစ်ကြိမ်တစ်ခါမျှ အရေးယူခြင်း မခံရကြောင်း ဒေသခံများ
ပြောကြားချက်အရ သိရှိရသည်။

မွေခေါဝ်

Thursday, 01
July 2010 20:38

သျှမ်းသံတော်ဆင့် - နအဖအရာရှိများ ခြစားမှုကြောင့် နမ့်ခမ်းတွင် မူးယစ်ဆေးဝါး ပေါများ