ရခိုင်ပြည်နယ် သံတွဲနှင့် ကျောက်ဖြူ မြို့နယ်များတွင် HIV၊ AIDS ရောဂါ ကုသရေးအတွက် ART ဆေးဝါးကုသရေး စင်တာများကို ဖွင့်လစ်သွားမည်ဟု ပြည်နယ်ကျန်းမာရေး ဦးစီးမှူး ဒေါက်တာ သောင်းလှိုင်က ဆိုသည်။
ပြည်နယ်အတွင်း HIV/AIDS ရောဂါ ကူးစက်ခံရသူ တစ်ထောင်ကျော်ရှိပြီး အေအာတီ ဆေးဝါးရရှိသူ ထက်ဝက်သာရှိသည် ဟု ဒေါက်တာ သောင်းလှိုင်က ဆိုသည်။
“ရောဂါကူးစက်တဲ့ သူတွေက တဖြည်းဖြည်းများလာတယ်၊ ပြီးတော့ တနေရာနဲ့ တနေရာ သွားလာရမလွယ်ကူတဲ့ အတွက် နီးစပ်ရာ မြို့တွေမှာ ဖွင့်ပေးဖို့စီစဉ်တာ" ဟု ဒေါက်တာ သောင်းလှိုင်က ဆိုသည်။
ရခိုင်ပြည်နယ်တွင် HIV/AIDS ကူးစက်ခံရသူများကို နယ်စည်းမထား ဆရာဝန်များအဖွဲ့က အဓိက ဆေးဝါးကုသမှုများ ပြုလုပ်ခဲ့သော်လည်း ယင်းအဖွဲ့သည် ရခိုင်ပြည်နယ်တွင်းရှိ ဆေးခန်းများကို ပိတ်သိမ်းပြီးနောက်ပိုင်း လူနာ အများစု ဆေးဝါးပြတ်လတ်မှုများ ရှိခဲ့သည်ဟုလည်း ၎င်းက ဆိုသည်။
“ဆေးမရတဲ့ လူတွေ အများကြီးရှိပါသေးတယ်၊ အထူးသဖြင့် ဒုက္ခသည် စခန်းတွေမှာပေါ့” ဟု MSF ၏ ဝန်ထမ်းဟောင်း ဦးကျော်လှအောင်က ဆိုသည်။
MSF ကမူ HIV/AIDS ကူးစက်ခံနေရသူများကို ကျန်းမာရေး ၀န်ကြီးဌာနက ကျန်းမာရေးစောင့်ရှောက်မှုများ ပိုမိုပြုလုပ်ပေးရန် တိုက်တွန်း တောင်းဆိုထားသည်။
လက်ရှိတွင် စစ်တွေမြို့၊ ဘူးသီးတောင် မြို့နှင့် မောင်တောမြို့များတွင် ART ဆေးပေးရေး စင်တာများ ဖွင့်လှစ်ထားသည်။
မဇ္ဈိမ (ရန်ကုန်) - ရခိုင်တွင် HIV ဆေးပေးဝေရေး စင်တာများ တိုးချဲ့မည်
