စံခလပူရီ
ဘက်ကမ်း ထိုင်းကုန်သည် အဝယ်ဒိုင်မှ တောက်တဲ့များကို ဈေးကောင်း ပေးဝယ် ယူနေမှုကြောင့်
ထိုင်း၊ မြန်မာ နယ်စပ် ဘုရားသုံးဆူမြို့နှင့် အနီးကျေးရွာများတွင် အခုရက်ပိုင်း အတွင်း၌
တောက်တဲ့ရှာမည့်သူ အလွန်များပြား လာသည်ဟု မြို့ခံများမှ ပြောပါသည်။
မည်သည့်
အမျိုးအစား တောက်တဲ့မျိုးကိုမဆို အနည်းဆုံး ထိုင်းအလေးချိန် (၃) ခစ် (၂ဝ ကျပ်သားခန့်)
ရှိ အပြစ်အနာအဆာ မရှိသည့် တောက်တဲ့ အရှင်များကိုသာ ဝယ်ယူနေ သည်ဟု ဘုရားသုံးဆူ မြို့ခံ
များမှ ပြောပါသည်။
တောက်တဲ့
ဝယ်ယူနေမှုနှင့် ပက်သက်ပြီး တောက်တဲ့ ဖမ်းသူတစ်ဦးက ယခုလို ရှင်းပြပါသည်။
တောက်တဲ့
တစ်ကောင်ဆိုရင် ထိုင်းအလေးချိန် (၃) ခစ် ဗမာအလေးချိန်နဲ့ ဆိုရင် (၂ဝ) ကျပ်သား ပြည့်ရင်
သုံးဆူမှာ (၁၅ဝဝ) ဘတ် ပေးဝယ်နေတယ်။ ထိုင်းကုန်းဘက်မှာ သွားရောင်းရင်တော့ တစ်ကောင်ကို
(၂၅ဝဝ) ဘတ် အထိ ဝယ်နေတယ်။ အခုဆိုရင် တောက်တဲ့ ဖမ်းသူတွေ များနေတယ်ပေါ့။ ဒါပေမဲ့ (၃)
ခစ်လောက် အလေးချိန်ရှိတဲ့ တောက်တဲ့ဟာ တော်တော် ကြီးတယ်။ သူ့အလေးချိန်က ပေါ့တယ်။
သို့သော်လည်း
တောက်တဲ့များကို ရှာဖွေ ဖမ်းဆီးရာတွင် အခက်အခဲ ရှိနေသည့်အတွက် လိုအပ်သော အရည်အတွက်
မရရှိသေးဟု ဘုရားသုံးဆူမြို့ အဝယ်ဒိုင် တစ်ဦးမှ ပြောပါသည်။ ယခင်ကဆိုလျှင် ထိုင်းနယ်စပ်ကနေ
လော၊ ရှမ်းများ အနေနှင့် တောက်တဲ့များကို စားစရာအဖြစ်နဲ့ နှစ်ခြိုက်စွာ စားသုံးကြသော်လည်း
ယခုအခါ တောက်တဲ့ အန်ဖတ်ကို HIV/AIDS ရောဂါ ကုသရာတွင် အသုံးပြုရန် အတွက် ယခုလို တောက်တဲ့များ
ဝယ်ယူနေရသည်ဟု အဝယ်ဒိုင်နှင့် နီးစပ်သည့် ဘုရားသုံးဆူ ဒေသခံ တစ်ဦးမှ ပြောပါသည်။
အဆိုပါ
တောက်တဲ့များကို အရှင်မွေးပြီး ဆေးဝါးအဖြစ် ဖေါ်စပ်သည့် ဖြစ်စဉ်အပေါ် ဆရာဝန်တစ်ဦးက ဤကဲ့သို့
ထင်မြင်ချက် ပေးပါသည်။
ဒီတောက်တဲ့မှာတော့
အံတာရယ် တံထွေးရယ် အဲဒီမှာက အင်ဇိုင်းတွေ ပါတယ်။ နောက် ဓါတုပစ္စည်း ထူးထူးဆန်းဆန်းတွေတော့
ပါနိုင်တယ် ပေါ့လေ။ တကယ်လို့ အေအိုင်ဒီအက်(စ်) အတွက် ဆေးဖက်ဝင်တယ် ဆိုရင်တော့ အင်မတန်
ဝမ်းသာစရာပေါ့။ တကယ်လို့ ဆေးဖက်ဝင်ရင် တောက်တဲ့ကို မွေးမြူတဲ့ အတွေ့အကြုံ ရှိတဲ့သူတွေ
အများကြီး။ သုတေသန လုပ်ပြီးတော့ သုတေသနရဲ့ တွေ့ရှိချက် ထောက်ခံချက်တွေနဲ့မှ သေချာတယ်။
စဉ်းစားစရာက မွေးတဲ့ နေရာမှာ သူတို့ အစားအသောက်မှာ ကျွေးတဲ့ဟာဘဲ စားရမှာပေါ့။ အဲတာသူ့ရဲ့
သဘာဝ သူစားချင်ရာ စားတဲ့ဟာ မစားရဘူးဆိုရင် လျော့နဲရင်လဲ လျော့နဲမယ်။ ကျွန်တော် ထင်မြင်ချက်
အနေနဲ့ကတော့ ဘာမှ သိပ်မထူးခြားဘူး။
တောက်တဲ့သတ္တဝါသည်
ရုပ်သွင်ပြင်မှာ ကြောက်စရာ ကောင်းသော်လည်း အိမ်မှာရှိပါက အေးချမ်းပြီး မြွေဆိုးများ
မဝင်နိုင်ကြောင်း မွန်၊ မြန်မာ လူမျိုးများက ယုံကြည်ကြသည်။ မိမိဥကို ပြန်စား တတ်သောကြောင့်
ပေါက်ပွါးနှုန်း နဲပါးကာ ရှားပါး သတ္တဝါစာရင်းတွင် ပါနေပြီးဟု သဘာဝ ပတ်ဝန်းကျင် ထိန်းသိမ်းရေး
လေ့လာသူ တစ်ဦးက ပြောပါသည်။ တောက်တဲ့သတ္တဝါကို ယခင်က တရုတ်ပြည် နယ်စပ်များတွင် မှောင်ခို
ရောင်းဝယ်မှုများ ရှိခဲ့သည်။
ယခုလို
ထိုင်းနိုင်ငံဘက်မှ ဈေးကောင်း ပေးဝယ်နေမှုကြောင့် တွားသွား သတ္တဝါမျိုးစိပ် တစ်ခု ရှားပါး
သွားမှာ စိုးရိမ်စရာဟု သဘာဝ ပတ်ဝန်းကျင် ထိန်းသိမ်းရေး လေ့လာသူ တစ်ဦးမှ ပြောပါသည်။
ကိုသိုက်၊ ကောင်းဝါ
၆
သြဂုတ်၊ ၂၀၁၀
Kaowao Newsgroup
- ဈေးကောင်းပေးဝယ်မှုကြောင့် သုံးဆူနယ်စပ်တွင် တောက်တဲ့ရှာဖွေ ဖမ်းဆီးမှု များလာ
