ဂလိုဘယ်ဖန် Global Fund အဖွဲ့က မြန်မာနိုင်ငံကို ၁၁ကြိမ်မြောက်ပေးမယ့် ရန်ပုံငွေတွေကို မပေးတော့ဘဲ ရပ်ဆိုင်းလိုက်တဲ့ အတွက် ပြည်တွင်းက HIV ဗိုင်းရပ်စ်ကူးစက်နေကြသူ ဝေဒနာရှင် ၇ သောင်းလောက် ဆေးဝါးရရှိရေး ခက်ခဲနေတယ်လို့ နယ်စည်းမခြား ဆရာဝန်များ အဖွဲ့ MSF က ပြောပါတယ်။လာမယ့် ၁ နှစ် ၂ နှစ်လောက် အချိန်အတွင်းမှာ ကုသမှု ပေးနိုင်တဲ့ အခြေအနေ လျော့နည်းသွား လိမ့်မယ်လို့လည်း MSF က ခန့်မှန်းပါတယ်။

HIV patients in Burma အန်အယ်လ်ဒီ လူမှုအထောက်အကူပြုအဖွဲ့က စောင့်ရှောက်ထားတဲ့ HIV ကူးစက်နေသူများ မြန်မာနိုင်ငံရဲ့ လူထုကျန်းမာရေးမှာ အဓိကပြဿနာတွေဖြစ်တဲ့ AIDS ရောဂါနဲ့ ဆေးယဉ်နေတဲ့ TB အဆုတ် ရောဂါတွေကို ကုသဖို့က ရန်ပုံငွေ ရရှိဖို့ အရေးကြီးတယ်လို့ နယ်သာလန်နိုင်ငံ MSF ရုံးက ဂျိုးဗီလီဗူ (Joe Billivea) က ပြောပါတယ်။ Global Fun အဖွဲ့ဟာ အရင်တုန်းကတော့ မြန်မာနိုင်ငံထဲမှာ ခရီး သွားလာခွင့် ကန့သတ်ခံရတဲ့ အတွက် လုပ်ငန်းတွေကို လွတ်လွတ်လပ်လပ် မလုပ်နိုင်လို့ဆိုပြီး ရန်ပုံငွေတွေ ဆက်မပေးဘဲ ရုပ်သိမ်းခဲ့ဖူး ပါတယ်။

အခု ပြဿနာမှာ မြန်မာနိုင်ငံ တခုထဲအတွက်သာ မဟုတ်ဘဲ Global Fund က ၁၁ကြိမ်မြောက် ရန်ပုံငွေပေးအပ်ရေးမှာ အနောက်တိုင်းနိုင်ငံတွေက ပေးထားတဲ့ ကတိအတိုင်း ဆက်ပြီး ငွေမပေး နိုင်ကြတော့လို့ ရန်ပုံငွေ မရှိတော့တာကြောင့် ဖြစ်တယ်လို့ ဂျိုးဗီလီဗူက ပြောပါတယ်။ အနောက်နိုင်ငံတွေက ရန်ပုံငွေ မပေးနိုင်တော့တာ ဘာကြောင့်လဲဆိုတာ မသိပေမဲ့ အခုချိန်မှာ မြန်မာနိုင်ငံဘက်က ပူးပေါင်း ဆောင်ရွက်မှုတွေ ရှိလာပြီး လုပ်ငန်းတွေ လွတ်လွတ်လပ်လပ် ဆောင်ရွက်နိုင်တယ် ဆိုတာတော့ မြင်နေရတယ်လို့လည်း သူက ပြောပါတယ်။

MSF ဟာ စီမံကိန်းကြီးတွေ ချမှတ် ဆောင်ရွက်နေတုန်းဖြစ်ပြီး မြန်မာနိုင်ငံက လူတွေအနေနဲ့ MSF ဆီကနဲ့ တခြား အကူအညီပေးရေး အဖွဲ့တွေဆီက အကူအညီတွေရဖို့ မျှော်လင့်နိုင်သေးတဲ့ အပြင် မြန်မာအစိုးရ ဘက်ကလည်း ကုသရေးအပိုင်းမှာ ပိုလုပ်လာတဲ့အတွက် အဲဒီဘက်ကလည်း အကူအညီ တချို့ရနိုင် ပါတယ်လို့ ဂျိုးဗီလီဗူက ပြောပါတယ်။ အခု သတင်းကို အလှူရှင်တွေဘက်ကကြားပြီး ပိုကူညီလာကြဖို့ မျှော်လင့် ပါတယ် လို့လည်း MSF က ပြောပါတယ်။

ဘီဘီစီ - မြန်မာ HIV ဝေဒနာရှင်တွေ ဆေးရဖို့ခက်