ကျွန်တော်တို့
အဖွဲ့အနေနဲ့ အိတ်ခ်ျအိုင်ဗွီ ကူးစက်မှု လျှော့ချရေး စီမံချက်အနေနဲ့ ကွန်ဒုံးတွေကို အခမဲ့
ဖြန့်ဝေလျှက် ရှိပါတယ်။ အထူးသဖြင့် ကာမဈေးကွက် တည်ရှိနေတဲ့ သီရီမင်္ဂလာဈေး ပါတ်ဝန်းကျင်က
ပြည့်တန်ဆာများ၊ ဇိမ်ခေါင်းများ၊ အဆွယ်များ၊ သုံးစွဲသူများကို အဓိက ရည်ရွယ်ပြီး ဖြန့်ဝေ
ပေးနေပါတယ်။ သို့ပေမယ့်လည်း အခက်အခဲတွေက ရှိနေဆဲပါ။ ခေါင်းနဲ့ အဆွယ်တွေက ယူကြပါတယ်။
သူတို့ ကိုယ်တိုင်လည်း သုံးကြပါတယ်။ ကစားစရာ ပူဖေါင်းတစ်ခုလို သဘောထားပြီး လေမှုတ်သွင်းပြီးလည်း
ဆော့ကြ ပါသေးတယ်။

သုံးစွဲသူ
လူတန်းစားကို နှစ်မျိုး ခွဲနိုင်ပါတယ်။ အိမ်ထောင် မရှိသူများကတော့ လိုလိုလားလား ယူဆောင်
သွားကြပါတယ်။ တကယ် သုံးကြမယ်လို့ ယူဆလို့ ရပါတယ်။ အိမ်ထောင် ရှိသူများကတော့ အိမ်သူသက်ထား
ဇနီးမယားတွေ ငြိုငြင်မှာကို တော်တော်လေး စိုးထိတ်ကြပြီး လက်မခံ တတ်ကြပါဘူး။ သူတို့တွေက
ကွန်ဒုံး မသုံးဘဲ ဆက်ဆံတော့ သူတို့ကနေ တဆင့် ဇနီးသည်တွေကို ကူးစက်ပျံ့နှံ့ နိုင်ပါတယ်။
ပြည့်တန်ဆာတွေ ကြတော့ တချို့က ယူသွား ကြပါတယ်။ တောင်းကြပါတယ်။ တချို့ကတော့ သက်သေခံပစ္စည်း
ဖြစ်မှာစိုးလို့ အကြောက်အကန် ငြင်းကြ ပါတယ်။ မယူရဲ့ ကြပါဘူး။ ရဲက ကွန်ဒုံးတွေ့ရင် ဖမ်းလို့
ပါဆိုပဲ။ အခုဆို မိန်းခလေး တစ်ဦးကို ကွန်ဒုံးတွေ့တိုင်း ပြည့်တန်ဆာ ပါလို့ စွပ်စွဲပြီး
ဖမ်းလို့ မရဘူး ဆိုတာကို ညွှန်ကြားချက်တွေ အသီးသီး ထုတ်ပြန် ထားပါတယ်။ မြို့နယ် အတွင်းက
ရယက ရုံးတွေကိုပါ ညွှန်ကြား ထားပါတယ်။

အဲဒါကို မသိရှာတဲ့ သူတို့ လေးတွေခင်မျာ ရဲတွေ
ဖမ်းသမျှ နုရတဲ့ ဘ၀ကို ရောက်နေ ရရှာပါတယ်။ ရဲတွေက အခုထိ ကွန်ဒုံးတွေ့တိုင်း ဖမ်းနေဆဲပါတဲ့။
တော်တော် ဆိုးတာက ညကြီး မိုးချုပ် မိန်းခလေး တစ်ဦး အဖေါ်အပေါင်း မပါဘဲ လမ်းလျှောက် ပြန်လာလို့
ရဲက စစ်တဲ့အခါ ပိုက်ဆံအိတ်ထဲမှာ ငွေတစ်သောင်းကျပ် အထက်၊ နှုတ်ခမ်းနီ၊ ပါးနီမိတ်ကပ်တွေ
ပါလာရင် ပြည့်တန်ဆာ ဆိုပြီး ဖမ်းဆီးတာ တွေလဲ ရှိပါတယ်တဲ့။ အမျိုးကောင်း သမီးတွေ အတွက်တော့
ရင်လေးစရာပါပဲ။ ဒီလောက် ညွှန်ကြားချက်တွေ ထုတ်ထားတဲ့ အကြားက လက်တစ်လုံးခြား (သို့) ပေါ်ပေါ်တင်တင်
လုပ်ချင်သလို လုပ်နေတာတွေက ရောဂါ ဆိုးကြီးကို တိုက်ဖျက်ဖို့ ကြိုးစားနေတဲ့ လူမှုရေး
လုပ်ငန်းတွေ အောင်မြင်ဖို့မှာ တံတိုင်းကြီးတစ်ခု ကာထားသလို ဖြစ်နေတော့မှာပါပဲ ခင်ဗျာ။

အိတ်ခ်ျအိုင်ဗွီကို
တိုက်ဖျက်ဖို့ အားလုံးမှာ တာဝန်ရှိပါတယ်။ သင်လည်း တာဝန်ရှိပါတယ်။ ကြိုးစား ပေးကြပါ။

RAVEN Blood Donor Club

January
21, 2007

Ravenbdc
- Harm Reduction